کرناٹک ہائی کورٹ میں 8 فروری کو حجاب تنازعہ سے متعلق عرضی پر سماعت ہوئی۔ سماعت شروع ہونے کے بعد ہائی کورٹ نے واضح لفظوں میں کہہ دیا کہ وہ جذبات نہیں بلکہ صرف اور صرف قانون کو مدنظر رکھنے والے ہیں۔ ’آج تک‘ پر شائع ایک رپورٹ کے مطابق عدالت نے باقاعدہ قرآن کی ایک کاپی منگوائی اور پوچھا کہ کیا قرآن میں یہ لکھا ہے کہ حجاب ضروری ہے؟ جواب میں عرضی دہندہ کے وکیل نے کہا کہ قرآن کی آیت 24:31 اور 24:33 (سورۃ النور) ہیڈ اسکارف (حجاب) کی بات کرتا ہے۔ آئیے دیکھتے ہیں سورۃ النور کی آیت 31 کا اردو ترجمہ:
’’مسلمان عورتوں سے کہو کہ وه بھی اپنی نگاہیں نیچی رکھیں، اور اپنی عصمت میں فرق نہ آنے دیں، اور اپنی زینت کو ظاہر نہ کریں، سوائے اس کے جو ظاہر ہے، اور اپنے گریبانوں پر اوڑھنیاں ڈالے رہیں، اور اپنی آرائش کسی کے سامنے ظاہر نہ کریں، سوائے اپنے خاوندوں کے، یا اپنے والد کے، یا اپنے خسر کے، یا اپنے لڑکوں کے، یا اپنے خاوند کے لڑکوں کے، یا اپنے بھائیوں کے، یا اپنے بھتیجوں کے، یا اپنے بھانجوں کے، یا اپنے میل جول کی عورتوں کے، یا غلاموں کے، یا ایسے نوکر چاکر مردوں کے جو شہوت والے نہ ہوں، یا ایسے بچوں کے جو عورتوں کے پردے کی باتوں سے مطلع نہیں۔ اور اس طرح زور-زور سے پاؤں مار کر نہ چلیں کہ ان کی پوشیده زینت معلوم ہو جائے۔ اے مسلمانو! تم سب کے سب اللہ کی جناب میں توبہ کرو تاکہ تم نجات پاؤ۔‘‘
