سوشل میڈیا پلیٹ فارم پر ایک بلوچستانی بچے کی رقص کرتے ہوئے ویڈیو خوب وائرل ہو رہی ہے۔ بچے کا نام سبحان سہیل ہے جو بالی ووڈ اداکار ٹائیگر شراف کا بہت بڑا شیدائی ہے۔ دلچسپ بات یہ ہے کہ جب سبحان سہیل کی ویڈیو ٹوئٹر پر ٹائیگر شراف نے دیکھی تو ان کی خوشی کی انتہا نہیں رہی۔ انھوں نے ریپلائی کرتے ہوئے لکھا ’’امید ہے کسی دن ملاقات ہوگی۔‘‘ یعنی وہ اپنے ننھے شیدائی سے ملاقات کرنے کی خواہش رکھتے ہیں۔
جہاں تک ٹائیگر شراف کے دیوانے سبحان سہیل کے رقص کا سوال ہے، وہ ٹائیگر کے کئی اسٹیپس کاپی کرتا ہے۔ 10 سالہ سبحان کچھ ویڈیوز میں ٹائیگر شراف کے گانوں پر ٹھیک انہی کی طرح رقص کرتا ہوا دکھائی دے رہا ہے۔ چھوٹی سی عمر میں اپنے بریک ڈانس سے اس نے کئی لوگوں کو اپنا دیوانہ بنا لیا ہے۔ سبحان کے والد کہتے ہیں کہ ’’یہ ٹائیگر شراف کے گانوں پر رقص کرتا ہے، ان کی فلمیں دیکھتا ہے، وہ ان کا بہت بڑا شیدائی ہے اور ان سے ملنا چاہتا ہے۔‘‘
گویا کہ سبحان سہیل بھی ٹائیگر شراف سے ملاقات کرنے کی خواہش رکھتا ہے۔ اب جب دونوں کی ہی خواہش ایک دوسرے سے ملاقات کرنے کی ہے، تو امید کی جا سکتی ہے کہ جلد ہی دونوں کو ہم ایک ساتھ رقص کرتے ہوئے بھی دیکھیں گے۔ ویسے سبحان سہیل کا کہنا ہے کہ وہ مائیکل جیکسن کا بھی شیدائی ہے اور بڑے ہو کر انہی کی طرح رقص کرنے کی خواہش رکھتا ہے۔
